धादिङ (प्रस), राष्ट्रिय कृषिगणना २०६८ का विषयमा अन्तरक्रिया कार्यक्रम सम्पन्न भएको छ । राष्ट्रिय कृषि गणना कार्यालय धादिङको आयोजनामा बुधवार भएको अन्तरक्रिया कार्यक्रममा कृषि गणनाका विषयमा छलफल गरिएको थियो । ‘छौठौ राष्ट्रिय कृषि गणना २०६८ मा राजनीतिक दलहरुको भूमिका’ विषयक अन्तरक्रिया कार्यक्रममा जिल्ला कृषिगणना कार्यालय धादिङका अधिकृत डा. विष्णु मोहन भट्टराईले कृषि गणनाको महत्वको विषयमा जानकारी गराउनुभएको थियो । 

उहाँले प्रत्येक १०/१० बर्षमा सञ्चालन गरिने कृषि गणनामा यसपटक पशुहरुको समेत गणना गरिने भएकाले पनि यसपटकको गणना महत्वपूर्ण रहेको बताउनुभयो । उहाँले कृषि गणनाबाट प्राप्त सुचनाले किसानलाई राज्यले प्रदान गर्नुपर्ने कृषि सेवा सुविधा सम्बन्धी नीति निर्माण गर्न सघाउने कुरामा जोड दिनुभयो । गणनाबाट प्राप्त हुने कृषि तथा पशुपंक्षीको विवरणले कृषि तथा सहकारी मन्त्रालय एवं जिल्ल पशु विकास कार्यालयलाई कृषि उपजहरुले ओगटेको क्षेत्रफल र पशुपंक्षी सम्बन्धी डाटावेश तयार गर्न तथा विस्तृत सर्वेक्षण गर्न सघाउने छ ।  

अन्तरक्रिया कार्यक्रममा दिइएको जानकारी अनुसार यस वर्षको राष्ट्रिय कृषि गणना २०६८ को तालिम कार्यक्रम गणक तथा सुपरिवेक्षकका लागि यही पुष २१ गते देखि पुष ३० गतेसम्म रहेको र कृषि गणनाको स्थलगत तथ्याङ्क संकलन माघको पहिलो हप्ताबाट फागुनको अन्त्यसम्म सम्पन्न हुनेछ । डा. भट्टराईले राष्ट्रिय कृषिगणना २०६८ को लागि धादिङ जिल्लामा एघार लाख बहत्तर हजार खर्च हुने बताउनुभयो । अन्तरक्रिया कार्यक्रममा जिल्लामा क्रियाशिल राजनीतिक दलका प्रतिनिधि तथा जिल्ला कृषिगणना समन्वय समितिका अध्यक्ष एवं प्रमुख जिल्ला अधिकारी नारायणप्रसाद आचार्य र समितिका सदस्यहरुको उपस्थिति रहेको थियो ।