किराञ्चोक (प्रस), नजिकिँदै गरेको गाउँ परीषदलाई मध्यनजर गर्दै मंगलबार किराञ्चोक गाउँ विकास समितिका दुईवटा वडामा वडास्तरीय भेला सम्पन्न भएको छ । आफ्नो वडामा रहेका समस्याहरुको पहिचान गरी गाउँ परिषदमा पेश गर्ने उद्देश्यका साथ भेला आयोजना गरिएको हो । किराञ्चोक गाउँ विकास समितिको  २ नं. वडामा भएको भेलमा वडा नागरिक मञ्चका अध्यक्ष चन्द्रबहादुर बलको अध्यक्षता र मञ्चका सदस्य तथा स्थानीय समाजसेवी एवम् बुद्धिजिविहरुको उपस्थिति रहेको थियो । सो अवसरमा भएको छलफलबाट गाउँ परिषदमा पेश गर्ने गरी केहि समस्या र आवश्यकताहरु पहिचान गरिएको छ । यसअघि मंगलबार नै किराञ्चोक –१, मा पनि वडा नागरिक मञ्चका अध्यक्ष सुनिता खतिवडाको अध्यक्षता भेला सम्पन्न भएको थियो । भेलाले आफ्नो वडा भित्र रहेका समस्या र अवश्यकताहरुको पहिचान गरेको छ । सो अवसरमा किराञ्चोक गाउँ विकास समितिका कार्यलय सहायक महेश न्यौपाने र नारी जागरण केन्द्रका सामाजिक परिचालीका अम्बिका श्रेष्ठले सहभागीहरुलाई विषयबस्तु बारे प्रस्ट््याउनु भएको थियो । भेलामा सहभागीहरुले आ–आफ्नो क्षेत्रमा विद्यमान समस्याहरु र वजेटको आवश्यकताका विषयमा कुरा राखेका थिए ।