झार्लाङ (प्रस), पोल गाडेको एक दशक वितिसक्दा पनि गाउँमा विद्युतिकरणका लागि लाइन बिस्तार नहुँदा धादिङ जिल्लाको उत्तरी भेगमा पर्ने झार्लाङ र सेर्तुङ गाविसका वासिन्दाले अझै पनि विजुली बाल्न पाएका छैनन ।  नेपाल विद्युत प्राधिकरण नुवाकोट÷रसुवा शाखा मार्फत धादिङ जिल्लाको उत्तरी भेगका विकटका वस्तिहरुमा विद्युतिकरणका लागि भनेर एक दशक अघि गाडिएको पोल कुहिएर कामै नलाग्ने भईसकेको छ भने, गाउँबासी घर घरमा सोलार जडान गर्न बाध्य भएका छन । पोल गाडेको एक दशक वितिसक्दा पनि गाउँमा विजुली नआएपछि गाउँवासीले विजुलीको विकल्पको रुपमा सोलार जडान गर्नुपरेको स्थानीयबासी बताउँछन । जिल्ला सदरमुकाम धादिङबेसीवाट निकै टाढा रहेको कारण लाइन विस्तार गर्नसम्भव नभएको भन्दै नुवाकोटबाट विजुली लाइन विस्तार गर्न शुरु गरिएको विद्युतिकरण कार्यक्रम प्राधिकरणको ढिलाई र स्थानीयबासी बीचको विवादले गर्दा अलपत्र बन्न पुगेको हो । यस अघि झार्लाङ गाविससँगै रहेको जिल्लाकै दार्खा गाविसमा पनि पोल गाडेको १६ बर्ष पछि मात्र गाउँमा विजुलीलाइन विस्तार भएकाले झार्लाङ र सेर्तुङमा पनि अझै विजुली आउने आशामा गाउँवासी रहेका छन् ।