सल्यानकोट (प्रस), सल्यानकोट उप–स्वास्थ्यचौकी बेलुङमा महिला तथा प्रजनन् स्वास्थ्य सम्बन्धी एकदिने शिविर आइतबार सम्पन्न भएको छ । पाठेघर खस्ने समस्या भएका महिलाहरुलाई लक्षित गरेर आयोजित शिविरमा ६१ जना महिलाको स्वास्थ्य परिक्षण गरिएको आयोजकले जनाएको छ । सो अवसरमा स्वास्थ्य परिक्षण गरिएका मध्ये ४ जना महिलामा पाठेघर खस्ने समस्या पाईएको थियो । पाठेघर खस्ने समस्याको पहिचान भएका ४ जना महिलाहरुलाई निःशुल्क शल्यक्रियाको लागि शिरमेमोरियल हस्पिटल काठमाडौं रिफर गरिएको सल्यानकोट उप–स्वास्थ्यचौकीका प्रमुख ज्ञानबहादुर दाहालले बताउनुभयो । शिविरमा सल्यानकोट गाउँ विकास समितिका अलावर छिमेकी गाविसहरु आगिञ्चोक, फूलखर्क लगायतका बासिन्दाले पनि सेवा लिएका थिए । शिविरमा कल्पना लम्सालको नेतृत्वमा रहेका ३ जना चिकित्सकको टोलीले सेवा दिएको थियो ।