(प्रत्यूष सम्बाददाता) आरुघाट, नेपाली कागजको प्रयोग हराउंदै गए संगै नेपाली कागज उद्योग पनि संकटमा पर्न थालेको छ । सरकारी कामकाजका लागि अनिवार्य रुपमा प्रयोग हुने गरेको नेपाली कागज उत्पादनका लागि आवश्यक कच्चा पदार्थ लोक्ता र आवश्यक जनशक्तिको अभाव बढ्दै जानथालेपछि नेपाली कागज उद्योग संकटमा पर्न थालेको हो । धादिङको सल्यानटार –१, आरुघाटमा सञ्चालनमा रहेको जिल्लाकै एकमात्र र पुरानो नेपाली कागज उद्योगले आवश्यक कच्चापदार्थको अभावका कारण पहिलेको तुलनामा उत्पादन कम हुन थालेको उद्योग सञ्चालकले बताएका छन् । 

मनास्लु नेपाली कागज उद्योगको नामबाट सञ्चालित नेपाली कागज उद्योगका लागि चाहिने कच्चा पदार्थ (लोक्ता) उच्च हिमाली भेगमा मात्र पाइने र संरक्षणको अभावले गर्दा केही बर्षयता हिमाली भेगमा लोक्ताको उत्पादनमा कमी आउन थालेपछि उद्योग नै प्रभावित हुन पुगेको मनास्लु नेपाली कागज उद्योगका सञ्चालक सानुकाजी श्रेष्ठले बताउनुभयो । कागज उद्योगका लागि आवश्यक कच्चा पदार्थ संगै दक्ष जनशक्तिको पनि अभाव हुन थालेको सञ्चालक श्रेष्ठले बताउनुभयो । बर्षौदेखि नियमित रुपमा नेपाली कागज उत्पादन गर्दै आइरहेको मनास्लु नेपाली कागज उद्योगले देशका मुख्य शहरहरुका अतिरिक्त विदेशमा पनि निर्यात हुने गरेको छ । 

आफ्नो उत्पादन गुणस्तरको भएकै कारण देशका विभिन्न मुख्य शहरहरु काठमाण्डौ, पोखरा, चितवन, गोरखा, पाल्पा, भैरहवा, बुटवल लगायत अन्य स्थान र जापानमा समेत सहजै रुपमा विक्री वितरण गर्दै आएको सञ्चालक श्रेष्ठले बताउनुभयो । तर, पछिल्ला दिनमा कच्चा पदार्थमा आएको कमी र जनशक्तिको अभावमा आफुले माग भएजति उत्पादन दिन नसकेको सञ्चालक सानुकाजी श्रेष्ठले बताउनुभयो । आवश्यक कच्चा पदार्थ लोक्तालाई धेरैपटक प्रशोधन गरी नेपाली कागज बनाउन निकै समय र खर्च लाग्ने हुंदा अहिले उत्पादन कम हुन थालेको श्रेष्ठले बताउनुभयो । लोक्ताको अभाव बढ्दै जानथालेपछि यसको संरक्षणको लागि आफुले स्थानीय सामुदायिक वन संग परामर्श शुरु गरेको र वन समूहका प्रतिनिधिले यसलाई सकारात्मक रुपमा लिएको उहाँले बताउनुभयो । हिमाली भेगमा मात्र उत्पादन हुने लोक्ता संरक्षण भएको खण्डमा आफुले चाहेजति उत्पादन दिन सक्ने सञ्चालक श्रेष्ठले दावी गर्नुभयो ।

मनास्लु कागज उद्योगको उत्पादन नेपाली कागज कम्प्युटरमा प्रिन्ट गर्न मिल्ने किसिमको भएको कारण पनि कागजको माग बढ्न थालेको छ । अन्य उद्योगको तुलनामा यसरी प्रिन्ट पेपर छाप्न मिल्ने उत्पादनको लागि जनशक्ति र कच्चा पदार्थ पनि बढि खर्च हुने गरेको सञ्चालक श्रेष्ठले बताउनुभयो । जिल्लाकै पुरानो र एकमात्र नेपाली कागज उद्योगको रुपमा रहेको मनास्लु कागज उद्योग संरक्षणमा आफुले निकै कोशिस गरेको पनि सञ्चालक श्रेष्ठले बताउनुभयो । तर, अहिले बढ्दै गएको आधुनिकीकरण संगै कागज उद्योग पनि आधुनिकीकरण गर्ने योजना उहाँले लिनुभएको छ ।