लापा (प्रस), नमस्ते ग्रामिण विकास समाज लापा, नहुदा महिला स्वास्थ्य ललितपुर र चाहिल हेवेन क्यानडाको संयुक्त पहलमा लापा गाउँ विकास समितिको वडा न. ३ र ७ का ५ जना महिलाले पाठेघर खस्ने समस्याको सल्यक्रिया गरी सफल उपचार गराएका छन् । दुर्गम ग्रामिण भेगका महिलाहरुमा धेरै मात्रामा पाठेघर खस्ने समस्या रहेको विभिन्न तथ्याङ्कहरुले देखाउँदै आएका छन् । पाठेघर खसेका महिलाहरु समाजमा आफ्नो समस्या देखाउन लाज मान्ने गरेका कारण लामो समयसम्म यसको पिडाबाट छुट्कारा पाउन नसकेको पनि विभिन्न संस्थाहरुले बताएका छन् । 

ग्रामिण भेगमा स्वास्थ्य संस्था तथा स्वास्थ्य कार्यकर्ताको समेत कमी रहेको र महिलाहरुमा त्यस किसिमको चेतनाको विकास हुन नसकेको कारण पनि आफ्नो समस्या लुकाएर लामो समयसम्म पिडा सहनुपरेको नमस्ते ग्रामिण विकास समाज लापाका कर्यकारी निर्देशक दिनेश तामाङले बताउनुभयो । पाठेघर खसेर समस्यामा रहेका महिलाहरुको समस्या हल गर्न आफूहरुले सक्दो पहल गर्ने र धेरै महिलाहरुको समस्या समाधान गरिसकेको पनि उहाँले उल्लेख गर्नुभएको थियो । 

पाठेघर (आङ) खस्ने समस्या भएका महिलाहरुलाई आफ्नो समस्या नलुकाउन र सजिलै तरिकाबाट स्वास्थ्य संस्थामा लैजान समेत उहाँले  आग्रह गर्नुभएको छ । लापा जस्तो ठाउँमा रहेर पनि आफूहरुको संस्थाले सेवामुखी काम गर्न थालेको उल्लेख गर्दै उहाँले त्यस्ता महिलाहरुलाई आफ्नो संस्थासँग सम्पर्कमा आए सहयोग गर्न सकिने भएकाले आफ्नो समस्या नलुकाउन समेत आग्रह गर्नुभएको छ  । पाठेघर खस्ने समस्यामा रहेका जो कोहि महिलाहरुलाई पनि आफूहरुले सहयोग गर्दै आएको उहाँको भनाई रहेको छ ।