धादिङ (प्रस), आज धादिङ लगायतका जिल्लामा २ बर्षदेखि माथिका मानिसलाई हात्तीपाइले विरुद्धको औषधी खुवाईंदै छ । आजदेखि २४ सम्म सञ्चालन हुने औषधि खुवाईने कार्यक्रमका लागि स्वास्थ्यकर्मी, स्वयंसेवक समेत गरी १ हजार ९ सय ७३ जनालाई औषधी खुवाउने कार्यमा परिचालन गरिएको जिल्ला स्वास्थ्य कार्यालय धादिङका बरिष्ठ जनस्वास्थ्य प्रशासक भोगेन्द्रराज डोटेलले बताउनुभयो । आज औषधी खान छुटेकालाई भोली र पर्सी घर घरमा गएर औषधी खुवाइने कार्यक्रम रहेको पनि डोटेलले बताउनुभयो । खाना खाएपछि मात्र खानुपर्ने यस रोगविरुद्धको औषधी ७ दिनकी सुत्केरी आमा र गर्भवति महिलाले सेवन गर्न नहुने स्वास्थ्य कार्यालयले जनाएको छ । सन् २०२० सम्ममा हात्तीपाईले रोग निवारणको राष्ट्रिय कार्यक्रम अनुसार धादिङमा अहिले पांचौ चरणको औषधि वितरण कार्यक्रम शुरु भएको छ । धादिङमा हात्तीपाईलेबाट सल्यानटार, बेनीघाट र केवलपुर गाविसका मानिसहरु बढि प्रभावित रहेको जिल्ला स्वास्थ्य कार्यालयको तथ्याङ्कले देखाएको छ ।