धादिङबेसी (प्रस), सरकारले एक साताभित्र माग पूरा गरिदिने आश्वासन दिएपछि पूर्व लडाकुहरूले गरेका नेपाल बन्द लगायतका आन्दोलनका कार्यक्रमहरू फिर्ता लिएका छन् । शान्ति तथा पुनर्निर्माण मन्त्रालयमा विहिवार भएको वार्तामा सरकारले बहिर्गमनमा परेका पूर्व लडाकुहरूको मागका सम्बन्धमा अध्ययन गर्न एक हप्ताको समय मागेको छ । बुधवारको वार्तामा सरकारका तर्फबाट शान्तिमन्त्री सत्या पहाडीले र पूर्व लडाकुहरूका तर्फबाट बहिर्गमित लडाकु सङ्घर्ष समितिका संयोजक सागर लिम्बुले नेतृत्व गर्नुभएको थियो । सरकारले आफ्ना मागहरूलाई अध्ययन गरी एक सातापछि फेरि अर्को वार्ता गर्न सहमति जनाएको संयोजक लिम्बुले बताउनुभयो । अनमिनले आफूहरुलाई अयोग्यताको विल्ला लगाएर अपमान गरेको आरोप लगाउँदै पूर्व लडाकुहरुले अयोग्यको विल्ला फिर्ता लिनुपर्ने, दीर्घकालिन व्यवस्थापनसहितको प्याकेज बनाउनु पर्ने लगायतका माग राख्दै विभिन्न चरणको आन्दोलन गर्दै आएका थिए । यसअघि बन्दका कारण धादिङ सहित देशभरको जनजिवन प्रभावित भएको थियो । धादिङबाट विभिन्न स्थानकालागि छुट्ने छोटो तथा लामोदुरीका सवारी साधन चलेका थिएनन् भने वजार तथा शैक्षिक संस्था समेत ठप्प रहेका थिए । यसैबीच जिल्ला प्रहरी कार्यालय धादिङले विहिवार धादिङबेसीबाट पक्राउ गरेका दुईजना बन्दकर्तालाई रिहा गरेको छ । बन्द फिर्ता भएसंगै उनीहरुलाई रिहा गरिएको जिल्ला प्रहरी कार्यालय धादिङले जनाएको छ । जिल्ला सदरमुकाम स्थित बीच बजारबाट बिहिबार दिउँसो प्रहरीले बहिर्गमित जनमुक्तिसेना नेपालका केन्द्रीय सदस्य शन्दिप रायमाझी र जिल्ला संयोजक रवि अधिकारीलाई नियन्त्रणमा लिएको थियो । बन्द खुलेसंगै देशभरको जनजीवन सामान्य बनेको छ । सरकारले एक सातासम्म पनि माग सम्बोधन नगरेमा थप आन्दोलनका कार्यक्रमहरु अघि बढाउने संगठनका जिल्ला सह–संयोजक दिपेन्द्र सिलवालले बताउनुभयो । सरकारले माग सम्बोधन गर्ने आश्वासन दिएकाले आफूहरुले बन्दको कार्यक्रमहरु स्थगित गरको धादिङमा आन्दोलनको नेतृत्व गर्नुभएका शन्तोष जिसिको भनाई छ ।